ወንጌል ቅዱስ ክፍል 28

====================

የጌታችን የኢየሱስ ክርስቶስ ቅዱስ ወንጌል።

ቅዱስ ማቴዎስ እንደ ጻፈው ።

ምዕራፍ ፪።

             ******

በእንተ ሚጠት እምነ ግብፅ፡፡

፲፮፡ ወሶበ ርእየ ሄሮድስ ከመ ተሣለቁ ላዕሌሁ ሰብአ ሰገል ተምን ጥቀ።

                  ******

፲፮፡ ሄሮድስ እንደዘበቱበት ባየ ጊዜ ማለት በአንተ በኩል እንመለሳለን ብለው በሌላ ጎዳና እንደሄዱ በሰማ ጊዜ ፈጽሞ ተበሳጨ። በማን ይበሳጫል ቢሉ ብስጩ ለልማዱ በአልጋው በመከዳው በቤተ ሰቡ የጨለማ ገልማጭ እንዲሉ። -

ወአዘዘ ሐራሁ ወፈነወ ይቅትሉ ኵሎ ሕፃናተ በቤተ ልሔም ወዘኵሉ አድያሚሃ። በቤተ ልሔም በአውራጃዋ ያሉ ሕፃናትን ሁሉ ግደሉ ብሎ አዝዞ ሰደደ። ዘ፪ኤ ዓመት፤ ወዘይንዕስሂ እምኔሁ ዓመት ከመንፈቅ ዓመት የሆነውንም፡፡

በከመ ሐሳበ መዋዕል ዘተጠየቀ እምኀበ ሰብአ ሰገል፤ ከሰብአ ሰገል ጠይቆ በተረዳው ዘመን ልክ፡፡

                  ******

፲፯፡ አሜሃ ተፈጸመ  ዘተብሀለ በ ኤርምያስ ነቢይ እንዘ ይብል ቃል ተስምዓ በራማ፡፡

                  ******

፲፯፡ ያን ጊዜ ኤርምያስ ቃል በራማ ተሰማ ብሎ የተናገረው ትንቢት ደረሰ ተፈጸመ ይደርስ ይፈጸም ዘንድ አዘዘ፤ ራማ በቁሙ ሰማይ፡፡ አንድም ከፍ ባለ ቦታ፡፡ አንድም በመላእክት ዘንድ፡፡ አንድም በእግዚአብሔር ዘንድ፡፡

ብካይ፤ የልጆቻቸው ከእናቶቻቸው ሲለይዋቸው፣

ወሰቆቃው፤ የናቶቻቸው፡፡

ወገዓር፤ የልጆቹ ጠምዘው ሲያርዷቸው፡፡ ወሕማም ብዙኅ ይላል ዘጠኝ ወር ከአምስት ቀን የፀነሰ ማሕፀን አይችልምና፡፡

                  ******

፲፰፡ ራሄል እንዘ ትበኪ በእንተ ውሉዳ፡፡ ኤር ፴፩፥፲፭፡፡

                  ******

፲፰፡ ራሄል ለልጆችዋ ስታለቅስ ተሰማ ያለው ይደርስ ይፈጸም ዘንድ አዘዘ። አንድም ደረሰ ተፈጸመ፡፡

(ሐተታ) ልያን አላነሣ ራሄል አለ ምነው ቢሉ የልያ ዕዳዋ ነው ጌታ ከሷ ወገን ተወልዷልና፡፡ የራሄል ግን ያለዕዳዋ ነው ጌታ ከሷ ወገን አይወለድምና አንድም የልያ በርኅቀተ ሀገር በብዛት ድነውላታል የራሄል ግን በማነስ በቅርብ አልቀውባታልና።

አንድም በራሄል ልያን መናገር ነው።

አንድም እናታችን ራሄል ኑራልን መከራችነን አይታ አልቅሳልን ብለው ስላለቀሱ፡፡

አንድም እንድናለን መስሏቸው ከመቃብረ ራሄል ገብተዋል ከዚያ እየገቡ ፈጅተዋቸዋልና።

አንድም በራሄል ሁሉን መናገር ነው፡፡ ይህማ እከፍሎ ውስተ ያዕቆብ ወእዘርዎ ውስተ እስራኤል እንዲል፤ ሁሉን በሚያገናኝ በያዕቆብ ባልተናገረውም ነበር ቢሉ ወንድ ልጅ ለፈረስ ሴት ልጅ ለበርኖስ ከደረሱ በኋላ የሞቱ እንደሆነ ኃዘን በአባት ይጸናል በሕፃንነት የሞቱ እንደሆነ ግን ኃዘን በእናት ይጸናልና በሚጸናው ተናገረ፡፡

አንድም ግፍ ለግፍ ሲያነጻጽር የቀደመችቱ ራሄል የምትባል ሴት ባሏ ሮቤልም ስምዖንም ይባላል ባሏ ሙቶ በባሏ ስፍራ ኖራ እርገጭ ብለዋት ስትረግጥ መንታ ፀንሳ ኑራ ወጥተው ወጥተው ወደቁ ደንግጣ ቆመች የሰው ሥጋ ያጸናዋል እንጂ ምን ይለዋል እርገጭ አሏት፡፡ ኢሀሎኑ በዝ ሰማይ አምላከ እስራኤል ብላ እንባዋን በእጁዋ ተቀብላ ወደ ላይ ረጭተዋለች፡፡ ሰማዕኩ ገዓሮሙ ለሕዝብየ ወወረድኩ ከመ አድኅኖሙ ያሰኘው ይህ ነው።

አንድም ራሄል መንግሥተ ሰማይ የሚገባባት አጥታ ታዝናለች ታለቅሳለች።

ወዓበየት ተናዝዞ ወነጊረ ላሀ ራሄል ልቅሶ መተውን መጽናናትን እምቢ አለች። ግፉ ያሳዝናልና የፆር ሞት ነውና ኀዘን በየደጁ ሁኑአልና።

እስመ ኢኮንዋ ውሉዳ ውሉደ ልጆቹአ ልጆች አልሆኑአትምና ሙተዋልና ማለት ነው። አንድም እስመ ኢኮኑ ውሉደ። ልጆቹአ አይደሉምና የተውሶ ናቸውና።

ወኢሀለዉ ። በሕይወተ ሥጋም የሉምና።

(ሐተታ) እነዚህንስ እንደምን አድርጎ ይሰበስባቸዋል ቢሉ ቄሣር ሕፃናትን ሰብስበህ ልብስ ምግብ እየሰጠህ በማር በወተት አሳድገህ ለእናት ለአባታቸው ርስት ጕልት እየሰጠህ ጭፍራ ስራልኝ ብሎኛል ብሎ አዋጅ ነገረ፡፡ ያላት ልጁዋን የሌላት ልብስ ምግብ ልቀበልበት ብላ እየተዋሰች ይዛ ሂዳለች እንዲሀ አድርጎ ሰብስቦ ፈጅቷቸዋል፡፡ ይህስ ዕዳው በማን ይሆናል ቢሉ በሱ፡፡ በዳዊት ምክንያት ፫፻፹፭ ሌዋውያን ቢያልቁ ፩፡ሳሙ ፳፪፥፲፰፡፡ በጴጥሮስ ምክንያት ፲፮ት ሰገራት ቢያልቁ ግብረ፡ሐዋ ፲፪፡-፲፱፡፡ ዕዳው በሳኦል በሄሮድስ ሆነ እንጂ በዳዊት በጴጥሮስ ሆነን እሊያስ ባያውቁ ነው እሱማ እያወቀ ቢሉ ያውቃልማ ካሉ ሁሉንም ያውቃል መጠቀማቸውንም ያውቃል። ለኒህስ ክብር አላቸው ቢሉ የላቸውም ይሏል። ይህማ እንዳይሆን ስንክሳር ተጽፎላቸው ታቦት ተቀርጾላቸው አብያተ ክርቲያናት ታንጾላቸው የለም ቢሉ ሳያውቁ በሠሩት ሥራ መጠቀም እንደሌለ ለማጠየቅ ነው እንጂ ክብር አላቸው፡፡

                  ******

፲፱፡ ወመዊቶ ሄሮድስ ናሁ መልአከ እግዚአብሕር አስተርአየ በሕልም ለዮሴፍ በብሔረ ግብፅ፡፡

                  ******

፲፱፡ ሄሮድስ ከሞተ በኋላ በግብፅ ሳለ ከእግዚአብሔር የታዘዘ መልአክ ለዮሴፍ በህልም ነገረው፡፡

                  ******

፳፡ እንዘ ይብል ተንሥአ ንሣእ  ሕፃነ ወእሞ ወሑር ውስተ ምድረ እስራኤል።

                  ******

፳፡ ተነሥተህ ብላቴናውን እናቱን ይዘህ ወደ ምድረ እስራኤል ተመለስ ብሎ ነገረው።

እስመ ሞቱ እለ የኃሥሥዋ ለነፍሰ ዝ ሕፃን።

የዚህን ብላቴና ሰውነት ለጥፋት የሚሹዋት ሰዎች ሙተዋልና። ኢትቀትል ነፍሰ እንዲል።

አንድም ነፍስ እንደነሣ ለማጠየቅ ለነፍሰ ዝ ሕፃን አለ።

(ሐተታ) ምነው የሞተ አንድ ሄሮድስ አይደለም ሞቱ ብሎ አበዛ ቢሉ። የምክር ጋናቸው እሱ ነው እሱ ከሞተ ያነሡታልን ብሎ።

አንድም በሦስት ዓመት ከመንፈቅ ስንኳን በዓላውያን ከተማ በምዕመናን ከተማስ እንኳ ብዙ ሰዎች ይሞታሉና። እሱንም የመሰሉ ሰዎች ሙተዋልና ሞቱ አለ።

                  ****** .

፳፩፡ ወተንሢኦ ነሥአ ሕፃነ ወእሞ ወቦዓ ውስተ ምድረ እስራኤል፡፡

                  ******

፳፩፡ ተነሥቶ ብላቴናውን እናቱን ይዞ ወደ ምድረ እስራኤል ተመለሰ።

                  ******

፳፪፡ ወሰሚኦ ከመ አርኬላዖስ ነግሠ ለይሁዳ ህየንተ አቡሁ ሄሮድስ ፈርሃ ሐዊረ ህየ።

፳፪፡ በአባቱ በሄሮድስ ፈንታ ይሁዳን ለመግዛት አርኬላኦስ እንደ ነገሠ ሰምቶ ወደ ኢየሩሳሌም መሄድ ፈራ።

                  ******

(ሐተታ)

                  ******

ይቆየን፡፡

**************

መልካሙ በየነ

ደብረ ማርቆስ፤ ኢትዮጵያ

28/06/2011 ዓ.ም

ወንጌል ቅዱስ ክፍል 27

 ====================

የጌታችን የኢየሱስ ክርስቶስ ቅዱስ ወንጌል።

ቅዱስ ማቴዎስ እንደ ጻፈው ።

ምዕራፍ ፪።

                  ******

፲፪፡ ወነገሮሙ በህልም ከመ ኢይግ ብኡ ኅበ ሄሮድስ።

                  ******

፲፪፡ በሄሮድስ በኵል አንዳይመለሱ በራእይ ነገራቸው።

ከነገ ከሠልስት ይመጣሉ ሲል እመቤታችን መንገድ እንድትገፋ ሃይማኖት እንዲሰፋ። በመጡበት የተመለሱ እንደ ሆነ ሃይማኖት ይጸናል እንጂ። አይሰፋም ባልመጡበት ቢመለሱ ግን ያልሰማው እየሰማ ይሰፋልና። አንድ መንገድ እንዲቀርባቸው ሁለት ዓመት የመጡትን በአርባ ቀን ገቡ የሚል ነውና።

ወእንተ ከልዕ ፍኖት ገብኡ ወአተዉ ብሔሮሙ። በሌላ ጎዳና በሌላ ኃይለ ቃል በሌላ ሃይማኖት ወደ ሀገራቸው ተመልሰው ገቡ። በሌላ ጎዳና ሁለት ዓመት የሄዱትን በአርባ ቀን ገብተዋል። በሌላ ኃይለ ቃል አይቴ ሀሎ እያሉ መጥተው ነበር። ረከብናሁ እያሉ ተመልሰዋል በሌላ ሃይማኖት ንጉሥ እያሉ መጥተው ነበር አምላክ እያሉ ተመልሰዋል።

                  ******

፲፫፡ ዘከመ ጐየ ውስተ ምድረ ግብፅ  ወእምድኅረ ኃለፉ እሉ ናሁ መልአከ እግዚአብሔር አስተርአዮ በሕልም ለዮሴፍ።

                  ******

፲፫፡ ወእንተ ካልዕ ፍኖት ገብኡ ወአተዉ ብሔሮሙ ብሎ ነበርና ሰብአ ሰገል ከሄዱ በኋላ ከእግዚአብሔር የታዘዘ መልአክ ለዮሴፍ በሕልም ነገረው። ሳሉ አለመንገሩ ከሄዱ በኋላ መንገሩ ስለምን ነው ቢሉ። ሰብአ ሰገል ሳሉ ነግሮት ቢሆን ሲሰደድ አይተው አምላክነቱን በተጠራጠሩ ነበርና። አንድም ከልቀረስ ይዘነው እንሂድ ባሉ ነበርና። ይዘውትም እንዳይሄዱ የጌታ ስደቱ ወደ ግብፅ ነው እንጂ ወደ ባቢሎን አይደለምና።

እንዘ ይብል ተንሥእ ወንሣእ ሕፃነ ወእሞ ወጉየይ ውስተ ምድረ ግብፅ። ተነሥተህ እናቱን ብላቴናውን ይዘህ ወደ ግብፅ ሂድ ብሎ ነገረው፡፡ (ሐተታ) ሕፃነ ወእሞ አለ ሕፃነ ብሎ እሞን ቢተው ብላቴናውን አለኝ እንጂ እናቱን አለኝ? ባለ ነበርና፡፡ እሞ ብሎ ሕፃነ ባይል እናቱን አለኝ እንጂ ብላቴናውን አለኝ? ባለ ነበርና ሕፃነ ወእሞ አለ።

አንድም ሰይጣን የሆነ የሆነ እንደሆነ አመልክቶ ይተዋል ለመልአክ ግን አካቶ መናገር ልማድ ነውና ሕፃነ ወእሞ አለ።

ወሀሉ ህየ እስከ አመ እነግረከ ተመለስ ብዬ እስክነግርህ ከዚያ ኑር አለው። እስመ ሀለዎ ለሄሮድስ ይኅሥሦ ለሕፃን ከመ ይቅትሎ። ሄሮድስ ብላቴናውን ሊገድለው ይሻው ዘንድ አለውና።

                  ******

፲፬፡ ወተንሢኦ ነሥአ ሕፃነ ወእሞ በሌሊት ወሖረ ውስተ ብሔረ ግብፅ።

                  ******

፲፬፡ ተነሥቶ ብላቴናውን እናቱን ይዞ በሌሊት ወደ ግብፅ ሄደ፡፡ ኮብላይ ለልማዱ መንገዱ ሌሊት ነውና። አንድም ወዲያው እንደ ነገረው ሳያንተላክስ ሄደ ሲል ሖረ በሌሊት አለ፡፡

                  ******

፲፭፡ ወነበረ ህየ እስከ አመ ሞቱ ለሄሮድስ። ሆሴዕ ፲፩፥፩፡፡

                  ******

፲፭፡ ሄሮድስ እስኪሞት ድረስ ፫ት ዓመት ከመንፈቅ በግብፅ ኖረ። ከመ ይትፈጸም ዘተብህለ እም ኀበ እግዚአብሔር በነቢይ እንዘ ይብል እምግብፅ ጸዋዕክዎ ለወልድየ እግዚአብሔር በነቢይ አድሮ ነቢይ ከእግዚአብሔር ተገልጾለት በነቢዩ ቃል ልጄን ከግብፅ ጠራሁት ተብሎ የተነገረው ይደርስ ይፈጸም ዘንድ።

(ሐተታ) ይህማ መውጣቱን ያስረዳል እንጂ መውረዱን ያስረዳልን ቢሉ ካልወረደ መውጣትን አለ አንድም እም ቅሉ ወደ ሲሆን ነው፡፡ ተጸውዑ እምቴዎፍሎስ ጽውዓን እምሰማይ እንዲል ልጄን ወደ ግብፅ ጠራሁት ተብሎ የተነገረው ይደርስ ይፈጸም ዘንድ ወደ ግብፅ ያደረገው ስለምን ቢሉ ትንቢቱ ምሳሌው ሊደርስ ሊፈጸም፡፡

ትንቢት ናሁ እወዲ እዴየ ውስተ ምድረ ግብፅ ወትከውን አሐቲ ሀገር ምሥዋዖ ለእግዚአብሔር ይላል ደብረ ቊስቋምም እስክንድርያም ቢሉ ወይወርድ እግዚእነ ውስተ ምድረ ግብጽ እንዘ ይጼዓን ዲበ ደመና ቀሊል፤ እምግብጽ ጸዋዕክዎ ለወልድየ ተብሎ ተነግሯል። ይህማ የተነገረ ለያዕቆብ አይደለም ቢሉ ለጊዜው ለያዕቆብ ቢሆን ፍጻሜው ለጌታ ነውና፡፡ ነቢየ ያነሥእ ለክሙ እምአኃዊክሙ ያለው ለኢያሱ ቢሆን ፍጻሜው ለጌታ እንደሆነ።

ምሳሌም አባቶቹ ወደ ግብፅ ተሰደዋል ትንቢቱን አውቆ አናግሯል። ምሳሌውንም እንጂ ባወቀ አስመስሏል ፍጻሜው እንደምነው ቢሉ ግብፅ ታቀርበዋለችና ይሹታልና ለፍቆሩ ይሳሳሉና። ክህደት በነዚህ ጸንቶ ነበርና። ወደ ጸናበትም መሄድ ልማድ ነው። አሁን በመዋዕለ ስብከቱ ደዌ ወደ ጸናባቸው ወደ ጌርጌሴኖን ሄደ ብሎ እንዲያመጣው።

አንድም ገዳማተ ግብፅን ለመባረክ ደጋጉ ገዳማት እነሲሐት እነ አስቄጥስ ከዚያ አሉና።

አንድም መልኩን አይተው የሚያምኑ አሉና። ወተበሀላ አዋልደ ሴሐት ንዑ ንርአዮ ለወልደ መንክራት እንዲል፡፡

አንድም ኪዳነ መልከ ጼዴቅን ለመፈጸም ዘመዶቼን ማርልኝ ቢለው ልጄን በሥጋ ሰድጄ እምርልሃለሁ ብሎት ነበርና።

አንድም ሃይማኖት ከሁሉ ሲጠፋ በግብፅ አይጠፋምና፡፡ እስከ ምጽአት ድረስ ወልድ ዋሕድ ስትል ትኖራለችና።

በዚያውስ ላይ መሰደዱ ስለምነው ቢሉ እንዳይሞት፡፡ ጊዜው አልደረሰምና ከዚያ ሳለ ድኖም ቢሆን ምትሐት ነው ባሉ ነበርና።

አንድም አዳም ከዚሀ ዓለም አፍአ ከምትሆን ከገነት ተሰዶ ነበርና ለዚያ እንደ ካሰ ለማጠየቅ።

አንድም ለሰማዕታት ስደትን ለመባረክ ሰማዕትነት ብቻ በእሳት በስለት አይደለም። አገርንም ጥሎ መሰደድ ስማዕትነት ነውና።

አንድም ጒየተ ሕፃን አጒየዮ ለዲያብሎስ እንዲል። አጋንንትን ከሰው ልቡና አስወጥቶ ለመስደድ፡፡

                  ******

በእንተ ሚጠት እምነ ግብፅ፡፡

፲፮፡ ወሶበ ርእየ ሄሮድስ ከመ ተሣለቁ ላዕሌሁ ሰብአ ሰገል ተምን ጥቀ።

፲፮፡ ሄሮድስ እንደዘበቱበት በየ ጊዜ ማለት በአንተ በኩል እንመለሳለን ብለው ብሌላ ጎዳና እንደሄዱ በሰማ ጊዜ ፈጽሞ ተበሳጨ።

                  ******

ይቆየን፡፡

**************

መልካሙ በየነ

ደብረ ማርቆስ፤ ኢትዮጵያ

27/06/2011 ዓ.ም