ወንጌል ቅዱስ ክፍል 25

 ====================

የጌታችን የኢየሱስ ክርስቶስ ቅዱስ ወንጌል።

ቅዱስ ማቴዎስ እንደ ጻፈው ።

ምዕራፍ ፪።

                  ******

፯፡ ወእምዝ ጸውፆሙ ሄሮድስ ለሰብአ ሰገል ጽሚተ።

                  ******

፯፡ ከዚህ በኋላ ሰብአ ሰገልን በቆይታ ጸራቸው። ካህናትን ጠይቆ ባዳራሽ አውጥቶ ሰብአ ሰገልን በእልፍኝ ጠራቸው። አሁን ከእኛ ጠይቆ ይነግራቸዋል እንዳይሉት። አንድም ካህናትን በእልፍኝ አስወጥቶ ሰብአ ሰገልን በአዳራሽ አስጠራቸው። ይኸውም ውዳሴ ከንቱ ሽቶ ነው። እኛስ እንኳ አውቀን ስንመጣ እሱ ከዚህ ሁኖ እስከ ዛሬ ሳይሰማ ኑሯል ይሉኛል ብሎ።

ወተጠየቀ እምኔሆሙ መዋዕሊሁ በዘአስተርአዮሙ ኮከብ። ኮከብ የታየበትን ቀን ጠየቃቸው። አንድም ኮከቡ በታየበት ቀን የጌታን ዘመኑን አውቆ ተረዳው። ይህን ኮከብ ከአያችሁ ምን ያህል ዘመን ሁኖታል አላቸው። ሁለት ዓመት ሁኖታል አሉት። ለካ ያም ብላቴና ሁለት ዓመት ሁኖታል አለ።

                  ******

፰፡ ወፈነዎሙ ኀበ ቤተ ልሔም።

                  ******

፰፡  ቤተ ልሔም ነው ብሎ ሰደዳቸው።

ወይቤሎሙ ሐዊረክሙ ተሰአሉ ጥዩቀ በእንተ ውእቱ ሕፃን ወእምከመ ረከብክምዎ ግብኡ ኀቤየ ወዜንዉኒ።

ሂዳችሁ የብላቴናውን ነገር ጠይቃችሁ ድርሱን ያገኛችሁት እንደሆነ በኔ በኩል ተመልሳችሁ ንገሩኝ አላቸው።

ከመ እምጻእ አነሂ ወእስግድ ሎቱ። እኔም መጥቼ እሰግደለት ዘንድ። ለሄሮድሳውያን ጒሕሉት ልማዳቸው ነውና እስግድ ሎቱ አለ እንጂ። እቅትሎ ሲል ነው (ሐተታ) እንዲህማ ከማለት ተቀድሞ ሄዶ አይነግራቸውምን ቢሉ ካህናቱ ዘመዶቹ ናቸውና ልከው ያሸሹብኛል ብሎ። በአንድ ሂዶ አይገድለውም ነበር ቢሉ ሰብአ ሰገል ይገላግሉኛል ብሎ። አይሆንም ያልኋቸው እንደሆነ ዕልፍ ዕልፍ ሠራዊት አስከትለው መጥተዋል አግባ መልስ ብለው ይጻሉኛል ብሎ። አንድም እኛ ብቻ መስሎን የሀገሩም ነገሥታት ያምኑበታልሳ ብለው የሰብአ ሰገል ሃይማኖታቸው እንዲጸናላቸው። መንፈስ ቅዱስ አፉን ከፍቶ ፊቱን ጸፍቶ አናገረው።

ወሰሚዖሙ ሖሩ እምኀበ ንጉሥ።

ቤተ ልሔም ነው ያላቸውን ሰምተው ወተአዚዞሙ ይላል። ወእምከመ ረከብክምዎ ግብኡ ኀቤየ ያላቸውን ሰምተው ንጉሥ ነውና ይበጅ ያድርግ ብለው ሄዱ።

                  ******

፱፤ ወናሁ ኮከብ ዘርእዩ በምሥራቅ ይመርሆሙ እስከ ሶበ አብጽሖሙ ቤተ ልሔም።

                  ******

፱፤ በሥምራቅ ያዩት ኮከብ ቤተ ልሔም እስኪያደርሳቸው ይመራቸው ነበር።

ወቆመ መልዕልተ በዓት ኀበ ሀሎ ሕፃን። ባለበት ቦታ በሰው ቁመት ልክ ዘቅዝቆ ቆመ ። በጣት ጠቅሶ እንደ ማሳየት።

                  ******

፲፤ ወርእዮሙ ኮከበ ተፈሥሑ ዓቢየ ፍሥሐ።

                  ******

፲፤ ኮከቡን አይተው ፈጽመው ደስ አላቸው። ለልማዱ ከሰው ሲደርሱ ይሰወራቸው ከሰው ሲለዩ ይመራቸው ነበር አሁን ቢገለጽላቸው እሱ እንጂ ቢሆን ነው ብለው። አንድም ስንኳን ሁለት ዓመት የሄዱለት ነገር ሁለት ሰዓት የሔዳለት ነገር ሲፈጸም ደስ ያሰኛልና። አንድም እንዲህ መርቶ ከምን ያደርሰን ይሆን። ከባሕር ያጠልቀን ከገደል ይጥለን ከፆር ያደርሰን ይሆን ብለው ነበርና ካሰቡት ቢያደርሳቸው ደስ አላቸው። አንድም የሚቀድመው አለ።

                  ******

፲፩፤ ወበዊዖሙ ውስተ ቤት ረከብዎ ለሕፃን ምስለ ማርያም እሙ

መዝ ፸፩፥፲።

                  ******

፲፩፤ ከቤት ገብተው ብላቴናውን ከእናቱ ጋረ አይተው። ከዚሀ በኋላ ኮከቡን አይተው አምሳያው ሁኖ ቢያገኙት ፈጽሞ ደስ አላቸው። ቤት በዓት ጎል ይላል አብነት። ቤት ቢል ዮሴፍ እንደ ዳስ አድርጎ ጥሎ ነበርና። በዓት ያለ እንደሆነ ኢዮስያስ በጨው ማሸጋ ግምብ ዓሠርቶት ነበርና። ጨውን ሲልሱ እንስሳት እየጋጡ አጐድጉደውት ነበርና። ጎል ያለ እንደሆነ የተመቸ የእንስሳት ማደሪያ ሁኖ ነበርና።

ወወድቁ ወሰገዱ ሎቱ።

ከፈረስ ከሰረገላ ወርደው ሰገዱለት። አንድም መላልሰው ሰገዱለት። (ሐተታ) እንደ ስናሩ ንጉሥ ጃን ተከል ሲደርስ ይሰግዳል። የታዘዘ ብላቴና መጥቶ ተነሥ ብለውሃል ይለዋል። ዳግም አልፎ ይሰግዳል። ተነሥ ብለውሃል ይለዋል እንዲህ እያለ ከዚያ ሲደርስ እጅ ነሥቶ ከዙፋኑ በቀኝ አብሮ ይቀመጥ ነበር።

ወአርኃዉ መዛግብቲሆሙ።

ሣጥናቸውን ከፈቱ። እየራሳቸው ጭነዋል ያሉ እንደሆነ የተመቸ። አንድ ነው ያሉ እንደሆነ ሰደፋ ብዙ ነውና፤ እንደ ሰደፍ ነፍጥ። አንድም ፈትሑ ወአርኃዉ ይላል ሣጥናቸውን ከፈቱ ኮረጅዋቸውን ፈቱ።

ወአብአ ሎቱ አምኃነ ወርቀ ከርቤ ወስኂነ።

ወርቁን ዕጣኑን ከርቤውን ግብር አገቡለት (ሐተታ) ወርቅ አመጡለት ይህን የምንገብራቸው ነገሥታት ቀድሞም ፍጡራን ኋላም ኃላፍያን ናቸው አንተ ግን ቀድሞም ያልተተፈጠርህ ነህ ኋላም የማታልፍ ነህ ሲሉ። ዕጣን አመጡለት ይህን የምናጥናቸው ጣዖታት ቀድሞም ፍጡራን ኋላም ኃላፍያን ናቸው። አንተ ግን ቀድሞም ያልተፈጠርህ ኋላም የማታልፍ ነህ ሲሉ። ከርቤ አመጡለት ምንም ቀድሞ ያልተፈጠርህ ኋላም የማታልፍ ብትሆን በሰውነትህ መራራ ሞትን መቀበል አለብህ ሲሉ።

አንድም ወርቅ ጽሩይ ነው፤ ጽሩየ ባሕርይ ነህ ሲሉ። ዕጣን ምዑዝ ነው፤ ምዑዘ ባሕርይ ነህ ሲሉ። ከርቤ የተሰበረውን ይጠግናል የተለየውን አንድ ያደርጋል። አንተም ከማኅበረ መላእክት የተለየ አዳምን አንድ ታደርገዋለህ ጽንዓ ነፍስ ሰጥተህ ታጸናዋለህ ሲሉ።

አንድም ወርቅ ጽሩይ ነው ባንተ ያመኑ ምዕመናን ጽሩያነ ምግባር ወሃይማኖት ናቸው ሲሉ። ዕጣን ምዑዝ ነው፤ ባንተ ያመኑ ምዕመናን ምዑዛነ ምግባር ወሃይማኖት ናቸው ሲሉ። ከርቤ አመጡለት በዕለተ ዓርብ ያቀምሱታልና።

አንድም ወርቅ የሰማዕታት ምሳሌ ነው ከመ ወርቅ በእሳት ፈተኖሙ ለሰማዕት እንዲል። ዕጣን የባሕታውያን። ከሩቅ እንዲሸት ባሕታውያንም በተስፋ ይኖራሉ። ከርቤ የምዕመናን በፍቅር አንድ ይሆናሉና።

ወርቅ አመጡለት ወርቅ የሃይማኖት ምሳሌ ወርቅ ጽሩይነቱም ግብዝነቱም የሚታወቅ በእሳት ሲፈተን ነው። የሃይማኖትም ጽሩይነቱና ግብዝነቱ የሚታወቅ መከራ ሲቀበሉበት ነውና። ዕጣን የተስፋ ዕጣን ከሩቅ እንዲሸት ተስፋም ያልያዙትን እንደያዙት ያላዩትን እንዳዩ ታደርጋለችና። አሚንሰ ትሬሰዮ ለዘኢሀለወ ከመ ዘሀለወ  እንዲል። ከርቤ የፍቅር ያ አንድ እንዲያደርግ ፍቅርም አንድ ታደርጋለችና። ሃይማኖት ፍቅር ተስፋ ገንዘቦችህ ናቸው ሲሉ ወርቅ ዕጣን ከርቤ ገበሩለት።

አንድም ወርቅ የመላእክት ዕጣን የደቂቀ አዳም ከርቤ የካልዕ ፍጥረት። ከመ ለስሙ ለኢየሱስ ክርስቶስ ይስግድ ኵሉ ብርክ ዘውስተ ሰማይ ወዘውስተ ምድር ወዘታሕተ ምድር እንዲል። መላአክት ደቂቀ አዳም ክልዕ ፍጥረት ገንዘቦችህ ናቸው ሲሉ ወርቅ ዕጣን ከርቤ አመጡለት።

ይህስ ከወዴት የመጣ ነው ቢሉ ሦስቱ መላእክት ቅዱስ ሚካኤል ቅዱስ ገብርኤል ቅዱስ ሩፋኤል ወርቅ ዕጣን ከርቤ አምጥተው ለአዳም ሰጡት።

                  ******

(ታሪኩን በቀጣይ ክፍል)

                  ******

ይቆየን፡፡

**************

መልካሙ በየነ

ደብረ ማርቆስ፤ ኢትዮጵያ

25/06/2011 ዓ.ም

ወንጌል ቅዱስ ክፍል 24

                 ====================

የጌታችን የኢየሱስ ክርስቶስ ቅዱስ ወንጌል።

ቅዱስ ማቴዎስ እንደ ጻፈው ።

ምዕራፍ ፪።

                  ******

፪፡ ወበጽሑ ውስተ ኢየሩሳሌም እንዘ ይብሉ አይቴ ሀሎ ዘተወልደ ንጉሠ አይሁድ።

                  ******

፪፡ የተወለደው የአይሁድ ንጉሥ ወዴት አለ እያሉ ኢየሩሳሌም ደረሱ። (ሐተታ) ምነው ኮከቡ ይመራቸው አልነበረምን? ቢሉ ከሰው ሲደርሱ ይሰወራቸው ነበርና። ከዚህም ስም ላዕላዊ ስም ማዕከላዊ ስም ታሕታዊ አለ። ስም ላዕላዊ ስም ታሕታዊ አልገለጸላቸውም። ስም ማዕከላዊ ገለጸላቸው እንጂ። ስለ ምን ቢሉ ስም ላዕላዊ ገልጾላቸው። አይቴ ሀሎ አምላኽ ዘተወልደ አይቴ ሀሎ ፈጣሪ ዘተወልደ ብለው ጠይቀው ቢሆን። እኒህ ሞኞች ተላሎች ሰማይና ምድር የማይችሉትን ማን ችሎት ተወለደ ይላሉ? ባሏቸው ነበርና። ይህንማ እንዳይሉ አሕዛብ አይደሉ እስራኤል አይደሉምን የተነገረውን ትንቢት የተቈጠረውን ሱባዔ ያውቁ የለም? ቢሉ። በዚያውስ ላይ እኛ ይልቅ አናውቀውምን? ባሏቸው ነበርና።

ስም ታሕታዊ ገልጾላቸው፤ አይቱ ሀሎ ሕፃን ዘተወልደ ብለው ጠይቀው ቢሆን እነዚህ ሞኞች ተላሎች በአዕላፈ እስራኤል ከተማ እልፍ ሙቶ እልፍ ተወልዶ ያድራል ስንቱን እናውቅላቸዋለን ባሏቸው ነበርና ስም ማዕከላዊ ገለጸላቸው።

እስመ ርኢነ ኮከበ ዚአሁ በምሥራቅ ወመጻእነ ከመ ንስግድ ሎቱ። በተፈጥሮ ገንዘቡ የሚሆን። አንድም አምሳያው የሚሆን ኮከቡን አይተን ልንሰግድለት መጥተናልና። ይኽስ በቁሙ ኮከብ ነውን መልአክን ቢሉ፤ መልአክ ነው። በምን ይታወቃል ቢሉ። ኮከብ በሌሊት እንጂ በመዓልት አይታይም። በመዓልት በመታየቱ። ኮከብ ወደ ምዕራብ ይሄዳል እንጂ ወደ መስዕ አይሄድም ። ወደ መስዕ በመሄዱ። ኮከብ መጥቆ ይሄዳል እንጂ በቆመ ብእሲ ዘቅዝቆ አይሄድም። በቆመ ብእሲ ዘቅዝቆ በመሄዱ። ይኽስ በሌሊት የሚታየውን በመዓልት እንዲታይ ወደ ምዕራብ የሚሄደውን ወደ መስዕ እንዲሄድ መጥቆ የሚሄደውን በቆመ ብእሲ ዘቅዝቆ እንዲሄድ የሚያደርግ እሱ ነው ብሎ በቁሙ ኮከብ ነው። ስለምን በኮከብ መራቸው ቢሉ በለመዱት ለመሳብ ኮከብ ያመልኩ ነበርና ከዚያ ሁሉ ግብፃውያን ላም ያመልኩ ነበር በለመዱት ለመሳብ ላም ሠዉልኝ እንዳላቸው።

                  ******

፫፡ ወሰሚዖ ሄሮድስ ንጉሥ ደንገፀ ወተሀውከ።

                  ******

፫፡ ንጉሥ ያሉትን ሰምቶ ሄሮድስ ደነገጸ አዘነ። ሐተታ ንጉሥማ ከሆነ ንጉሥ ሳይገድል ይነግሣልን ብሎ።

ወኵላ ኢየሩሳሌም ምስሌሁ፤ ተሀውከት ያለበት ነው። ከተማዪቱ ከሱ ጋራ እንደ እሱ ተደረጸች። የንጉሥ ሞት የፀሐይ ዕርበት የሁሉ ነውና።

አንድም ሶስቱ ነገሥታት ማንቱሲማር በዲዳስፋ ሜልኩ ይባላሉ ዕልፍ ዕልፍ ሠራዊት አስከትለው መጥተዋልና። ይኽን በሰማ ጊዜ ደነገጠ አዘነ ሕዝቡም ደነገጡ አዘኑ። ፄዋዌ ተመላልሶባቸው ነበርና። ታምረ ኢየሱስ ሦስት ይላል። ትርጓሜ ወንጌል ፲፪ አለ አይጣላም? ቢሉ አይጣላም። ነገር እንደ ትርጓሜ ወንጌል ነው፤ አሥራ ሁለት ሁነው ተነሥተል፤ ፈለገ ኤፍራጥስ ሲደርሱ ንጉሠ ነገሥቱ ፍርሻቡር ይባላል ዘጠኙን ይዟቸው ተመልሱዋል። በምን ምክንያት ቢሉ ከወደኋላችሁ ጦር ተነሣባችሁ ብለዋቸው።

አንድም ስንቅ አልቆባቸው። አንድም ኢየሩሳሌም ጠባብ ናት ለሰፈር አትበቃም ብለዋቸው ምሥጢሩ ግን ከበረከተ ልደቱ እንዳላሳተፋቸው ያጠይቃል። በደቂቀ ነቢያት ወይትነሥኡ ፯ቱ ኖሎት ወ፰ቱ ሠራዊት ይላልሳ? ቢሉ። ሰባቱ ንጉሠ ነገሥትነት የደረቡ ናቸው፤ አምስቱ ንጉሠ ነገሥትነት ያልደረቡ ናቸውና እንደ አንድ ንጉሠ ነገሥት አድርጎ ሳምኖሙ በማለት ተናገራቸው እንጂ ነገር እንደ ትርጓሜ ወንጌል ነው።

                  ******

፬፡ ወአስተጋብኦሙ ለኵሎሙ ሊቃነ ካህናት ወጸሐፍተ ሕዝብ።

                  ******

፬፡ የሕዝቡን ጸሐፍትና ሊቃነ ካህናትን ሰበሰባቸው። (ሐተታ) ሊቀ ካህናቱማ አንድ አይደለም ቢሉ። ምሉና ዱግ ሁነው ተሹመው ነበርና። አንድም አንዱ ሹም አንዱ የሹም ሽር ነው። ጸሐፍት የሚላቸው ወተሠይሞሙ ለለነገዶሙ እንዲል ከአሥራ ሁለቱ ነገደ እስራኤል ተወጻጽተው ርስት ከርስት ትውልድ ከትውልድ እንዳይፋለስ የሚጽፉ ናቸው። ይልቁንም ክህነት ከቤተ ሌዊ መንግሥት ከቤተ ይሁዳ እንዳይወጣ የሚጽፉ ናቸው። አንድም ከነገደ ስምዖን ተወልደው ይኽን ሁሉ የሚጽፉ ናቸው። ከኒህ ወግ ታሪክ አይታጣምና ብሎ ሰበሰባቸው።

ወይቤሎሙ በአይቴ ይትወለድ ክርስቶስ። ክርስቶስ ወዴት ይወለዳል? ብሎ ጠየቃቸው።

                  ******

፭፡ ወይቤልዎ በቤተ ልሔም ዘይሁዳ።

                  ******

፭፡ እንደ ዛሬ ምቀኝነት አልሰፋም ነበርና ቀንተው ይመልሱለታል። የይሁዳ ዕፃ በምትሆን በቤተ ልሔም ነው አሉት።

እስመ ከማሁ ጽሑፍ በነቢይ እንዲህ ያለ ጽሑፍ አለና ነበርና ይላል ወንጌላዊ ከነዋዌው ጠቀሰው። ወበእንቲአክሙ ይጸርፉ አሕዛብ ላዕለ ስመ እግዚአብሔር እንዲል።

                  ******

፮፡ ወአንቲኒ ቤተ ልሔም ምድረ ኤፍራታ ኢትቴሐቲ እምነገሥተ ይሁዳ። ሚክ ፭፥፪። ዮሐ ፯፥፵፪።

                  ******

፮፤ የይሁዳ ዕፃ የምትሆኝ አንቺም ቤተ ልሔም የይሁዳ ነገሥታት ከነገሡባቸው አሕጉር ብትበልጭ እንጂ አታንሽም የሚል ጽሑፍ አለና ነበርና ይላል።

እስመ እምኔኪ ይወጽእ ንጉሥ ዘይርእዮሙ ለሕዝብየ እስራኤል። ወገኖቼ እስራኤል ዘሥጋን የሚጠብቃቸው ንጉሥ ባንቺ ይነግሣልና። (ታሪክ) ነቢዩ ሚክያስ ነው ሌላውን ሲያስተምር ውሎ ወደ ማታ በቤተ ልሔም በኩል አልፎ ሲሄድ ተፈታ ምድረ በዳ ሆና ቋያ በቅሎባት አየ። እንዲህ እንጂ እንደሆንሽ አትቀሪም ንጉሥ ይነግሥብሻል የነጋሪት ድምፅ ይሰማብሻል ድንኳን ይተከልብሻል እስራሌል ደጅ ይጠኑብሻል አሕዛብ ይገብሩብሻል ብሎ ትንቢት ተናግሯል። ይህም አልቀረ ዘሩባቤል ነግሦባታል እስራኤል ደጅ ጠንተውባታል የነጋሪት ድምፅ ተሰምቶባታል አሕዛብ ገብረውባታል ድንኳን ተተክሎባታል። አንድም ወገኖቼ እስራኤል ዘነፍስን የሚጠብቃቸው ንጉሥ ክርስቶስ ባንች ይወለዳልና። ዘሩባቤል እንደ ነገሠ ጌታ ተወልዶባታል። ድንኳን እንደ ተተከለባት የብርሃን ድንኳን ተተክሉሎባታል። ነጋሪት እንደ ተሰማባት ቅዳሴ መላእክት ተሰምቶባታል። እስራኤል ደጅ እንደ ጠኑ መቶው ነገደ መላእክት ደጅ ጠንተውባታል። አሕዛብ እንደ ገበሩ ሰብአ ሰገል ገብረዋል። አንድም አንቺ የኤፍራታ ልጅ እመቤታችን በይሁዳ ከነገሡ ነገሥታት ብትበልጭ እንጂ አታንሽም ወገኖቼ እስራኤል ዘነፍስን የሚጠብቃቸው ንጉሥ ክርስቶስ ባንቺ ባሕርይ ይወለዳል እምኔኪ ከአንች ይወለዳልና።

                  ******

፯፡ ወእምዝ ጸውፆሙ ሄሮድስ ለሰብአ ሰገል ጽሚተ።

፯፡ ከዚህ በኋላ ሰብአ ሰገልን በቆይታ ጸራቸው።

                  ******

ይቆየን፡፡

**************

መልካሙ በየነ

ደብረ ማርቆስ፤ ኢትዮጵያ

24/06/2011 ዓ.ም

ወንጌል ቅዱስ ክፍል 23

                 ====================

የጌታችን የኢየሱስ ክርስቶስ ቅዱስ ወንጌል።

ቅዱስ ማቴዎስ እንደ ጻፈው ።

ምዕራፍ ፪።

                  ******

በእንተ ምጽአተ ሰብአ ሰገል።

ምዕራፍ ፪።

                  ******

፩፡  ወተወሊዶ እግዚእ ኢየሱስ በቤተ ልሔም ዘይሁዳ በመዋዕለ ሄሮድስ ንጉሥ ናሁ ሰብአ ሰገል መጽኡ እምብሔረ ጽባሕ። ሉቃ ፪፥፯።

                  ******

፩፡ ሄሮድስ ነግሦበት በነበረ ዘመን የይሁዳ ዕፃ በምትሆን በቤተ ልሔም ጌታችን ኢየሱስ ክርስቶስ ተወልዶ ሳለ በተወለደ ጊዜ ከተወለደ በኋላ። ሰብአ ጥበብ ሲል ነው ጥበብ ያላቸው ሰዎች ከወደ ምሥራቅ መጡ። ገል ውስተ አፈ ንጉሥ እንዲል። አንድም መሰግላን ይላል ጥበበኞች ሰዎች ማለት ነው።

(ሐተታ) ቤተ ልሔምን አነሣ ወአንቲኒ ቤተ ልሔም ብሎ የሚያመጣ ነውና። ሄሮድስን አነሣ ወአዘዘ ይቅትሉ ኵሎ ሕፃናተ ዘቤተ ልሔም ብሎ የሚያመጣ ነውና። አንድም ቤተልሔምን አነሣ ትንቢቱ ምሳሌው ሊፈጸም። ትንቢት ወአንቲኒ ቤተልሔም ተብሎ ተነግሯል። ምሳሌ ካሌብ ምድረ ርስትን ሰልሎ ሲመለስ ኬብሮንን አይቶ መጥቶ ኢያሱን ኬብሮንን ስጠኝ ቀድሞ ሙሴ ሰጥቶኝ ነበር። ከአሥራ ሁለቱ ጉበኞች አንዱ እኔ ነበርኩ ያን ጊዜ ፵ ዘመን ሁኖኝ ነበር። ዛሬም ፹ ዘመን ይሆነኛል ከአንተ ጋራ መውጣት መውረድ ይቻለኛል ገና ከጉልበት ነኝ አለው። እስራኤልን አስመክሮ ሰጠው እሱዋን እጅ አድርጎ አዙባ የምትባል አገባ። ከጠላቶቹ ወገን ነበረችና በሱዋ ስም አልጠራትም። ቀጥሎ ከብታ የምትባል አገባ በከብታ ከብታ ተብላለች። ቀጥሎ ኤፍራታ የምትባል አገባ። በኤፍራታ ኤፍራታ ተብላለች። ከሱዋ ወንድ ልጅ ወለደ በዚያ ወራት እንጀራ እገበ እገባ ብሎት ነበርና ስሙንም ልሔም አለው ኅብስት ማለት ነው። ወአምጽኡ ልሔሞሙ እንዲል ኅብስቶሙ ሲል። በልሔም ቤተ ልሔም ተብላለች። ከብታ ማለት ቤተ ስብሐት ማለት ነው። ቤት የእመቤታችን ስብሐት የጌታችን ምሳሌ ኤፍራታ ማለት ፀዋሪተ ፍሬ ማለት ነው። ፀዋሪት የእመቤታችን ፍሬ የጌታችን ምሳሌ። ቤተ ልሔም ማለት ቤተ ኅብስት ማለት ነው። ቤት የእመቤታችን ልሔም የጌታችን ምሳሌ።

ሄሮድስን አነሳ ዘመን ትውልድ የሚቆጠር በንጉሥ ነውና። (ታሪክ) እስክንድር የሚባል ንጉሥ ነበረ እሰክንድርያ የምትባል ሴት አግብቶ አቶሮብሎስን ሕርቃሎስን ይወልዳል በሚሞትበት ጊዜ ለሚስቱ ታናሹን አንግሠሽ ታላቁን ካህን አድርገሽ ኑሪ አላት። አድልቶ አይደለም ታናሹ ሕርቃሎስ ብልህ ነው ሰው ማሳደር ያውቃል ብሎ ነው እንጂ። እንደ ነገራት አድርጋ ስትኖር ሄሮድስ ወልደ ሐንዶፌር የእስራኤልን መንግሥት በማናቸውም ምክንያት ይፈላለገው ነበርና ከታላቁ ከአትሮብሎስ ይልክበታል። ታላቅ ሳለህ ታናሽ አዋቂ ሳለሀ አላዋቂ ያነገሡብሀ በምን ምክንያት ነው? ጦርም አንሶህ እንደሆነ ከኔ ወስደህ እሱን ገድለህ ንገሥ አለው። አሱም እውነት መስሎት ጦር ተቀብሎ መጥቶ ወንድሙን ገድሎ ነገሠ። የሕርቃሎስ አርስጥአሎስ የሚባል ልጅ ነበረው በጥበብም ቢሉ ተዋግቶም ቢሉ ያጐቱን ጆሮውን ቈረጠው። እስራኤል አካሉ የጐደለ አያነግሡም ነበርና መንግሥት በመከከል ሳለ እኅታቸው ማርያ ትባላለች እሱዋን አግብቶ ነገሠ። ምንም እሱ በጥበብ በተንኮል የነገሥኩ ቢመስለው መንግሥት ከቤተ ይሁዳ አልመጣም። ኢይጠፍዕ ምስፍና ወምልክና እምአባሉ ለይሁዳ እስከ አመ ይረክብ ዘጽኑሕ ሎቱ ተብሎ የተነገረው ትንቢት እንደ ተፈጸመ ለማጠየቅ በላዩ ላይ ሰማያዊ ንጉሥ ተወለደ ለማለት ሄሮድስን አነሣው።

እምብሔረ ጽባሕ አለ ብርሃን የሚገኝ ከምሥራቅ ነው። ብርህት ሕግ ሠራሁላችሁ ሲል። የምሥራቅ ወርቅ ጽሩይ ነው፤ ጽሪት ሕግ ሰራሁላችሁ ሲል። እኒህስ ምን ይዘው መጥተዋል ቢሉ ሠለስቱ መላእክት ሦስቱን ንዋያት ወርቅ ዕጣን ከርቤ አምጥተው ለአዳም ሰጡት። አዳም ንሥኢ ሕፄኪ ብሎ ለሔዋን ሰጣት። ከዚያ ሲወርድ ሲዋረድ ከአባታቸው እጅ ገብቷል። ዥረደሽት የሚባል ፈላስፋ አባት ነበራቸው። በቀትር ጊዜ ከነቅዓ ማይ አጠገብ ሁኖ ፍልስፍና ሲመለከት ድንግል በሰሌዳ ኮከብ ተሥላ ሕጻን ታቅፋ አየ። ፈጥኖ በሰሌዳ ብርት ቀርፆ አኖረው። በሚሞትበት ጊዜ እንዲህ ያለ ኮከብ ሲወጣ ባያችሁ ጊዜ ሰማያዊ ንጉሥ ይወለዳልና ወስዳችሁ ስጡ ብሏቸው ነበርና ያን ሰምተው ይዘው መጥተዋል። አንድም ዘእምዘመዱ ለበለዓም እንጂ ይላቸዋል። በለዓም ኮከብ ይሠርቅ እምያዕቆብ ያለውን ሰምተው ይዘው መጥተዋል። አንድም ትሩፋን ባቢሎን ሳሉ ነገሥተ ተርሴስ ወደሰያት አምኃ ያበውኡ ነገሥተ ሳባ ወዓረብ ጋዳ ያመጽኡ እያሉ ሲጸልዩ ይሰሙ ነበርና ይህን ይዘው መጥተዋል።

አንድም ባሮክ አቴና ወርዶ አሥራ ሦስት ያህል ልሳን ተምሯል ያን ጊዜ ዛሬ የሀገራችሁ ንጉሥ የሚገበረውን ወርቅ ኋላ በሀገራችን ከኛ ወገን ንጉሥ ተወልዶ ይገበረዋል ብሎ ነግሯቸው ነበርና ይህንን ይዘው መጥተዋል። አንድም ዳንኤል መቅደስ ትትሐነጽ እስከ ክርስቶስ ንጉሥ ወእምዝ ትትመዘበር ያለውን ሰምተው ይዘው መጥተዋል። አንድም ዳንኤልን ምንም እሱን ሰውነቱን ባይወዱት ነገሩን ይቀበሉት ነበርና ዛሬ የናንተ ሀገር ንጉሥ የሚገበረውን ኋላ ከኛ ወገን ንጉሥ ተወልዶ ይገበረዋል ብሎ ነግሯቸው ነበርና ይህን ሰምተው ይዘው መጥተዋል።

ለነዚህስ እንዲገለጽላቸው ያደረገ ስለምን ቢሉ ይሹት ነበርና ለፍቅሩ ይሳሱ ነባርና። ክሕደት በነዚህ ጸንቶ ነበርና። ክሕደትም ወደጸናበት መሄድ ልማድ ነው አሁን በመዋዕለ ስደቱ ክህደት ወደ ጸናባቸው ወደ ግብፅ ሄደ ብሎ እንዲያመጣው በእስራኤል ዘለፋ ለአሕዛብ ተስፋ ለመሆን እኛስ እንኳ አውቀን ስንመጣ እስካሁን ሳያውቁት ኑረው ብለው። አንደም ከመ ይንሣእ ንዋየ አቡሁ እንጂ ይላል ያባቱን ገንዘብ ለመቀበል። አሶር የአክዩ በዕብራውያን ወዕብራውያን የአክዩ በአሦር እንዲል። ነገሥተ ፋርስ ለፀብዕ እንጂ ለፍቅር አይመጣም ነበርና በጌታ ልደት ፍቅር እንደ ተጀመረ ለማጠየቅ

                  ******

፪፡ ወበጽሑ ውስተ ኢየሩሳሌም እንዘ ይብሉ አይቴ ሀሎ ዘተወልደ ንጉሠ አይሁድ።

፪፡ የተወለደው የአይሁድ ንጉሥወዴት አለ እያሉ ኢየሩሳሌም ደረሱ።

                  ******

ይቆየን፡፡

**************

መልካሙ በየነ

ደብረ ማርቆስ፤ ኢትዮጵያ

23/06/2011 ዓ.ም