ጾመ ነነዌ እና የድንግል ማርያም በዓለ እረፍት

፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠

ጾመ ነነዌ እና የእመቤታችን የቅድስተ ቅዱሳን የድንግል ማርያም በዓለ እረፍት አንድ ላይ ተገጣጥመዋል፡፡ ነነዌ ከጥፋት የዳኑበት ዕለት የአዳም ተስፋ ከሆነችው ከድንግል ማርያም እረፍት ጋር አንድ ላይ ተገናኝተዋል፡፡ ጾመ ነነዌ ከዐቢይ ጾም ፪ ሳምንታት ቀደም ብሎ ለሦስት ቀናት /ከሰኞ እስከ ረቡዕ/ ድረስ የሚጾም ነው፡፡ የነነዌ ሰዎች ከመጣባቸው የእግዚአብሔር ቁጣ የዳኑበት በመሆኑ እኛም ከሚመጣብን ፈተና ሁሉ እንድን ዘንድ፣ ከመከራ ሥጋና ከመከራ ነፍስ እንድንና እናመልጥ ዘንድ አምነን እንጾመዋለን፡፡ ሙሉ ታሪኩን /ትንቢተ ዮናስን በሙሉ ተመልከት/ ይህ ጾም የዐዋጅ ጾም መሆኑን በፍትሐ ነገሥት አንቀጽ ፲፭ ቁጥር ፭፻፷፯ ላይ “…የነነዌ ሰዎች ጾም ፫ ቀን…” ብሎ ይናገራል፡፡ ይህ ጾምም እንደ ዐቢይ ጾም በመጠንቀቅ እንዲጾም ያዝዘናል፡፡

ጥር ፳፩ እረፍታ ለቅድስት ወለንጽሕት ድንግል በክልኤ ማርያም

ማርያም ማለት ፍስሐ ወሐሴት፣ ተለአኪተ ሰብእ ወእግዚአብሔር፣ መርኅ ለመንግሥተ ሰማያት፣ ፍጽምት፣ ክብርት፣ ቅድስት ማለት ነው:: አንድም ማርን ከምድር ጣፋጭ ምግብ ያምን ከገነት ጣፋጭ ምግብ ሁለቱን ቢገጥሙት ማርያም የሚለው ይገኛል:: አንድም 

ማ-ማኅደረ መለኮት

ር-ርግብየ ይቤላ

ያ-ያንቀአዱ ኀቤኪ ኩሉ ፍጥረት

ም-ምሥሐል ወምስጋድ ማለት ነው::

ኃጢአት ሳይሠሩ መኖር እንኳን ለሰው ለመላእክትም እንኳ አልተቻላቸውም ነበር ከሰው ወገን ከሆነች ከድንግል ማርያም በቀር:: ድንግል ሲሆኑ እናት ደንግል ወእም መባል ለማንኛዪቱም ሴት አልተቻላትም ለእመ ብርሃን ለወላዲተ አምላክ ለንጽሕተ ንጹሐን ለቅድስተ ቅዱሳን ለአምላክ እናት ለድንግል ማርያም ብቻ ተቻለ እንጅ:: አምላክን መሸከም ለማንም አይቻለውም ወላዲተ አምላክ ድንግል ማርያም ግን እሳተ መለኮቱ ሳያቃጥላት በማህጸኗ ፱ ወር ከ ፭ ቀን ተሸከመችው:: ወለደችውም ጡቶቿንም አጠባችው ዳሰሰችው ሳመችውም፡፡ እሳትን ታቅፎ አለመቃጠል እሳትን ስሞ አለመንደድ ግሩም ነው፡፡ ምን ዓይነት ልዩ ቅድስና እና ፍጹምነት ነው አምላክን እንበለ ዘርእ ፀንሶ እስከመውለድ የሚያደርስ? ነቢያቱ ትንቢት የተናገሩላት ንጽሕት ዘር ድንግል ማርያም የድኅነታችን መጀመሪያ የንጽህናችንም መሠረት ናት:: ያለድንግል ማርያም ድኅነት ለዓለም አልተሠጠም:: ያ ቅዱስ ሥጋ የተቆረሰው ያ ክቡር ደም የፈሰሰው ከድንግል ማርያም የነሳው እንደሆነ አንጠራጠርም:: እውራን ያዩባት ድኩማን የጠነከሩባት ጎባጣዎች የቀኑባት ያረጁት የታደሱባት ድንግል ማርያም ለእኔስ መግለጫ ቃላትም የለኝ:: አባ ኤፍሬምስ የገናንነቷን ነገር መናገር አይቻልምና ዝም እንበል ማለቱ ለዚህ አይደል:: የሀናና የኢያቄም የማኅጸን ፍሬ ድንግል ማርያም በጥር ፳፩ ቀን በ፷፬ ዓመቷ አረፈች:: አይሁዳውያን ለምቀኝነት አያርፉምና ሥጋዋን እናቃጥል ቢሉ መብረቅ ፈጃቸው ሥጋዋም በጌቴሴማኒ በአትክልት ቦታ ተሰወረ:: በነሐሴም ሐዋርያቱ ሥጋዋን አግኝተው ቀበሯት እረፍት በጥር በነሐሴ መቃብር መባሉ ለዚህ ነው:: የአምላክ እናት ስትሆን እንደ ልጇ ሞተች ተቀበረች ተነሣች ዐረገች:: “ሞትሰ ለመዋቲ ይደሉ ሞታ ለማርያም የአጽብ ለኩሉ” ይላል ታላቁ ኢትዮጵያዊው ሊቅ ቅዱስ ያሬድ፡፡ አወ ሞት ለሟች ሁሉ የተገባ ነው ሞት ይገባልና፡፡ አምላክን በማኅጸኗ የተሸከመች አምላክን የወለከደች አምላክን ጡት ያጠባች ዘመናት የማይሽሩት ዘመናትን አሳልፎ የሚኖር ጌታ እናቱ የሆነች ድንግል ማርያም ስትሞት ግን በጣም ይገርማል በጣምም ይደንቃል፡፡ የአምላክ እናት ሞተች ከመባል በላይ ምን ድንቅ ነገር አለ ብሎ እንዲህ አለ፡፡ ኤልያስን፣ ሄኖክን ሳይሞቱ ወደ ብሔረ ሕያዋን የነጠቀ አምላክ እናቱን ግን በ፷፬ ዓመት እንድታርፍ ማድረጉ ድንቅ ነው፡፡

ያለድንግል ማርያም ኢየሱስ ክርስቶስን አናውቀውም ያለድንግል ማርያም መድኃኒት መስቀል በቀራንዮ አደባባይ አልተተከለም ያለድንግል ማርያም ለዓለም ሁሉ መድኃኒት የሆነው ጌታ በመስቀል ላይ አልተሰቀለም ያለድንግል ማርያም መንግሥቱን የምንወርስበት ቅዱስ ሥጋው ክቡር ደሙ አልተቆረሰም አልፈሰሰምም ስለዚህ ነው ያለድንግል ማርያም ዓለም አይድንም ሊድንም አይችልም የምንለው፡፡

“እመ አምላክ ድንግል ማርያም”ይህ ቃል ለአፍ ስንጠራው ሊቀለን ይችል ይሆናል እንጅ የእምነታችን ትልቁ ምሥጢር የእምነታችንም መሠረት የተመሠረተበት እምነታችን የታነጸበት ዋና ቃል ነው፡፡ ስለ ድንግል ማርያም የሚከራከሩን ሰዎች  ይህን ቃል ብትነግሯቸው ቀላል ተራ ቃል ሊመስላቸው ይችላል ከምንም ሳይቆጥሩም ቃሉን ሊጠሩት ይችላሉ ግን አይደለም፡፡ በእውነት ይህንን ቃል እየጠሩ ምን የሚሉት ክህደት ነው? እስኪ ሰው ሆነን እናስበውማ በጣም የረቀቀ ምሥጢርን ያዘለ ቃል እኮ ነው፡፡ በእውነት በእናታችን በቅድስት ድንግል ማርያም ላይ የሚሸፍት ልብ ምን አይነት ልብ ነው? ስለ እናታችን አማላጅነት ለመከራከር እኮ ይህን ቃል ግዴታ መጥራት አለብን፡፡ ይህን ቃል ከጠራነው ደግሞ ትርጉሙን መገንዘብ ያስፈልገናል፡፡ እስኪ በእውነት አስቡትማ ቢያንስ አሁን  ለደቂቃዎች ሰው እንሁንና አስተውለን እንረዳ “እመ አምላክ ወላዲተ አምላክ” ይህ ቃል ስለእውነት ገብቶን የምንጠራው ስንቶቻችን ነን? የሁለት ተቃራኒ ቃላት ጥምርታ እኮ ነው፡፡ “እመ አምላክ” የአምላክ እናት ማለት ነው “ድንግል ማርያም” ማለት ደግሞ ምንም ወንድ የማታውቅ ሴት ማለት ነው፡፡ “እመ አምላክ ድንግል ማርያም” ስንል ወንድን የማታውቅ በድንግልና በንጽሕና አምላክን ለመውለድ የበቃች አምላክን የወለደች እናት ማለት ነው፡፡ እንግዲህ እስኪ ሴቶች አስቡት እናት ተብሎ ድንግል ይባላልን? ድንግል ሆኖ ባለልጅ መሆንስ ይቻላልን? አይቻልም፡፡ ምንም ይሁን ምን ድንግል የሆነች ሴት ልጅ ልትወልድ አትችልም፤ በተመሳሳይ መልኩ ልጅ የወለደች ሴትም ድንግል ልትባል አትችልም፡፡ ድንግል ማርያም ግን ድንግል ወእም ስትባል ለዘለዓለም ትኖራለች፡፡ በእውነት ግን ምን ቃል ይገልጻታል እናታችንን ምን ቃል እንፈጥርላታለን ምን ምሳሌስ እንመስልላታለን፡፡ የማይቻለውን ቻለች የማይወሰነውን ወሰነች ዘመን የማይቆጠርለት መለኮትን ዘመን እንዲቆጠርለት አደረገች፡፡ ሰሎሜ ልታዋልድ ስትቀርብ በቅጽበት እጇ ተቃጠለ ቶማስ የተወጋ ጎኑን እዳስሳለሁ ብሎ እጁን ሲያስጠጋው እጁ እርር ኩምትር አለ እመቤታችን ግን በድንግልና ጸንሳ በድንግላ ስትወልደው እሳተ መለኮቱ አላቃጠላትም ከቶ ለምን ይሆን? እነዚያ ደቂቃ ላልሞላ ጊዜ እጃቸውን ማስጠጋት ያልተቻላቸውን እሷ ግን ታቀፈችው አዘለችው አይገርምም፡፡ አረ ቅዱሳኑም ሊቃውንቱም እመቤታችንን የሚገልጹበት ቃል የላቸውም “በመኑ ወበአምሳለ መኑ ናስተማስለኪ” ያላት ምስጋና የበዛለት አባ ሕርያቆስ አይደል እንዴ? ታዲያ ምሳሌ ሲያጣላት ቃል ባይገልጽለት ምን ያድርግ? ግርምት ድንግል ማርያም ያልገረመች ማን ይግረም፡፡ በዚያ በኃጢአት ዘመን የቀደመው የአዳም በደል በእናቷና በአባቷ ሳለ እርሷ ግን ያ በደል ሳያገኛት ለድኅነታችን የተወለደች የተፈጠረች ንጽሕት ዘር  ናት እናታችን እመብርሃን፡፡ በዚህ እንኳ በሰው ሚዛን በሰው ፍርድ እየመዘንና እየለካን ልንከራከር እንፈልጋለን፡፡ ጥንተ አብሶ አባትና እናቷ ስለነበረባቸው እርሷም አለባት ይላሉ ምስጋና ይግባትና፡፡ በዚህ ዘመን አባትና እናት በሽተኛ ሆነው ልጁም በሽተኛ ሆኖ ይወለዳል ብሎ መከራከር እንዴት ያለ ጭንቅላት ነው?

በእውነት ስሟን ጠርቶ የሚሰለች ማነው? እኔ እኮ እመብርሃንን የማከብራት እመ ብርሃንን የማመሰግናት እመ ብርሃንን የምሰግድላት ከመልአኩ ቅዱስ ገብርኤል ስለማልበልጥ ነው፡፡ መልአኩ ቅዱስ ገብርኤል እመቤታችንን ሲያበስር ሰግዶ ደስታ ይገባሻል ደስ ይበልሽ ብሎ እኮ ነው፡፡ ታዲያ እርሱ እንዲህ ከሰገደላት እንዲህ ካከበራት እኔ ማን ሆኜ ነው እናቴን ላቃልል የስድብ አፍ የምከፍተው? ስሟን መጥራትስ ይቻለኛል እንዴ እንኳን በእናቴ ላይ ስድብን ልሰነዝር የምደፍረው? እናስተውል ወገኖቼ መናፍቃኑ በሚጠሯት አጠራር አንጠራትም እኛ፡፡ ለእኛ እናታችን ናት ለእኛ መድኃኒታችን ናት ለእኛ ተስፋችን ናት ለእኛ ገነት መግቢያችን ናት ለእኛ መመኪያችን ናት ለእኛ ስንቃችን ናት ለእኛ እረፍታችን ናት ለእኛ መሰላላችን ናት ለእኛ የደስታችን መፍሰሻ የደስታችን መፍለቂያ የደስታችን ምንጭ ናት ለእኛ ብርሃናችን ናት ለእኛ አምላክን የወለደችልን ናት ለእኛ አማላጃችን ናት ለእኛ ሁለመናችን ናት ለእኛ በደማችን ውስጥ ያለች በልባችን ውስጥ የታተመች ናት ለእኛ ፍቅሯ በሁለመናችን የመላች እናታችን ናት፡፡ ይህን የምንለው መናፍቃኑን ለመከራከር መናፍቃኑን ለመቃወም አይደለም እናታችን ከዚህም በላይ ስለሆነችልን  ነው፡፡ እኛ ፍቅሯን ቀምሰነዋል እናትነቷን አውቀነዋል መሸሸጊያነቷን አይተነዋል አማላጅነቷን አምነነዋል ሁሉንም እንደሆነችን ተገንዝበናል ለዚህ ሁሉ ክብር ያበቃንም እመ ብርሃንን ለእናትነት የመረጣት ከሴቶች ሁሉ መርጦ ያከበራት አምላካችን ነው፡፡ አምላክ ራሱ ነው እነኋት እናትህ ብሎ በመስቀሉ ግርጌ ላይ እናቱን እናት አድርጎ የሰጠኝ፡፡ ዮሐ ፲፱፥፳፯

በእውነት እስኪ አስቡት ማን ነው ኃጢአት መሥራትን የማያውቅ? ከሰው ወገን ሆኖ በገቢር ባይፈጽም በነቢብ፣ በነቢብም ባይፈጽም በሀልዮ ኃጢአትን የማያደርግ ማነው? በእውነት ማነው ይህን ማድረግ የሚቻለው? ንጽሕናን እንደጠበቁ ምንም ኃጢአትን ሳያደርጉ እስከ ዘለዓለም መጽናት ለማን ተሰጠው? ለማንም አልተሰጠውም እኮ መላእክት እንኳ እንደ እርሷ ንጹሐን አይደሉም፡፡ እመቤታችን ግን ምንም አይነት ኃጢአት ርኩሰት የለባትም በሃሳብሽ ድንግል ነሽ በስጋሽም ድንግል ነሽ የምንላት ለምን መሰላችሁ ሃሳቧ ኃጢአትን ለማሰብ ጊዜ የሌለው ስለነበር እኮ ነው፡፡ እናታችን እመቤታችን ቅድስት ድንግል ማርያምን እናቴ የማይላት ከቶ ማነው? እርሱ እኮ መዳኑን የማይወድ ተስፋውን የማይሻ መጠጊያውን የማይፈልግ ከለላውን የማያውቅ መከታውን የዘነጋ ምርኩዙን መደገፊያውን የማይወድ ምግብ ስንቁን የሚጠላ ውሉደ አጋንንት ነው፡፡ እንዲያው ሌላውን እንተወውና አምላክን በድንግልና ለመውለድ መመረጧ እንዴት አያስደንቀንም? በድንግልና የሴቶች ልማድ ሳያገኛት በመንፈስ ቅዱስ ጸንሳ መገኘቷ እንዴት አያስደምመንም? ሰው ሆና ሳለች ከኃጢአትና ርኩሰት በሃሳብም በሥጋም ድንግል መሆኗ እንዴት አይገርመንም? መላእክት እንኳ ንጹሕ ባልሆኑበት ዓለም ለብቻዋ ንጽሕት ዘር መሆኗ እንዴት አይደንቀንም? በእውነት ስለእውነት ለስሟ መግለጫ ቃላት እኮ የለንም፡፡ እኛን የሚደንቀን እኮ እንደኛው ሰው ስትሆን እንዲህ ያለውን ንጽሕና ይዛ በመገኘቷ ነው፡፡ እኔ ሰው ነኝ አንተም ሰው ነህ አንችም ሰው ነሽ ማንነታችንን አናውቀውም እንዴ? ለትንሽ ጊዜ እንኳ እስኪ ሰው ሁኑ ያልኳችሁ ለዚህ ነው፡፡ በቅጽበት ውስጥ ምን ያህል ኃጢአትን ነው ስናነሣ ስንጥል የምንውለው? እኛ እንኳን ቆመን ተኝተንስ ኃጢአትን አይደል እንዴ ስንቃዥ የምናድረው እርሷ እንዲህ የሚባል ነገር የለባትም፡፡ ታዲያ እመቤታችን ያልገረመችን ማን ይግረምን? ከመላእክት ወገን ብትሆን እኮ እንዲህም ባልተገረምን ነበር ባልተደነቅንም ነበር ምክንያቱም ባሕርያቸውን ባሕርያችን ስላላደረግን እነርሱ እኮ ከእንደዚህ ባሕርይ ስለተፈጠሩ ነው እንል ነበር እመቤታችን ግን ሰው ናት ለዚያም ነው የደነቀችን የገረመችን፡፡ በእውነት “እመ አምላክ ድንግል ማርያም” የሚለውን ቃል ሳየው ሁልጊዜ አዲስ ነገር አዲስ ትምህርት አዲስ ቃል አዲስ ስብከት ነው ለእኔ፡፡ ዛሬም አዲሴ ነው ነገም እንደዚያው፡፡ ዝም ብሎም እናትና ድንግል ቢል ላይደንቀኝ ይችል ነበር “እመ አምላክ ሲባል ግን እንዴት አይደንቀኝም፡፡ ለሁሉም ነገር ግን አበው ተናግረውት ጽፈውት ያልጨረሱትን የክብሯን ነገር ስጨልፍ ብውል አልጨርሰውምና ዝም ልበል፡፡

በቀጣይ ሰንበት ትምህርት ቤት እና ገዳማትን በተመለከተ ቃለዓዋዲው ምን እንደሚል እጽፋለሁ፡፡ ሰንበት ትምህርት ቤቶችን ለመዝጋት ብቻ አንድን ደብር ገዳም ነው ብሎ መናገርስ ይቻላልን? ይጠብቁን፡፡

ከእናታችን ከቅድስት ድንግል ማርያም ረድኤት በረከት ያሳትፈን አሜን፡፡

፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠፠

✍✝✍✝✍✝✍✝✍✝✍✝✍

© መልካሙ በየነ

ጥር ፳፩ / ፳፻፲ ዓ.ም

ደብረ ማርቆስ፣ ኢትዮጵያ

✍✝✍✝✍✝✍✝✍✝✍✝✍